Ni Richard R. Gappi
Nagte-taping ngayong Martes ng tanghali, Oct. 24, 2017, ang talk show na ‘Talkback’ kung saan panauhin sina Angono, Rizal Mayor Gerry Calderon, San Felipe, Zambales Mayor Carolyn Farinas, at Valenzuela City Mayor Rex Gatchalian.
Ang ‘Talkback’ host ay si Karmina Constantino at ipapalabas ito sa Lunes, 7:30PM, Oct. 30, 2017 at may replay sa Martes, 1:00PM.
Ang Angono, San Felipe, at Valenzuela ang tatlo sa 10 pinarangalan ngayong taon ng Galing Pook Award ng Galing Pook Foundation.
Ang iba pang pinarangalan dahil sa kanilang husay ay ang San Luis, Aurora; Cagayan de Oro City; San Nicolas, Ilocos Norte; Palompon, Leyte; Davao del Norte; General Santos City; at Pasig City.
Ang 2017 Galing Pook Award ay nagbibigay ng pagkilala sa mga local government unit na may kakaiba, natatangi at inobatibong programa at proyekto.
Ngayong 2017, may 158 entry mula sa buong bansa ang nagsumite sa nasabing foundation.
Isa sa Top 10 o national winners ang bayan ng Angono dahil sa successful at sustainable economic program nito, partikular ang matagumpay na pamamalakad sa Angono public market, Zero Squatter Program at Zero Basura.
Si dating Marikina Mayor Marides Fernando ang chairman ng Gawad Galing Pook Foundation.
Binubuo ang foundation ng mga akademista, businessmen, mga dating opisyal sa antas lokal at pambansa, mga taga-DILG, mga taga-Landbank, at mula sa civil society groups at non-government organizations.